Mariateresa

Po’ venarrà nu iuorno ch’io sarraggio
sultanto nu ricordo,
e tu
me vedarraie luntano sempe ‘e cchiù,
a poco a poco
ati penziere pigliarranno posto
addò na vota tu ‘o penziero mio
scritto tenive,
albere nuove
cu ‘e ffrutte assaie cchiù belle nasciarranno
dint’ ‘o ciardino tuio
e tu
bisogno certo cchiù nun avarraie
d’ ‘o viecchio ciardeniere ch’io so’ stato.
Ma quanno macchie ‘e grigio perciarranno
l’aria celeste
d’ ‘o cielo attuorno a te
e tu chiagnenno ‘a capa appuiarraie
‘nfacci’ ‘o telaro d’ ‘o balcone
ancora
cercanno n’àttemo ‘e cunforto dinto
a na iurnata ‘e nuvole e scurore,
allora
na mano sentarraie dint’ ‘e capille
ca t’accarezza,
ca t’è cumpagna,
na mano,
ancora,
comm’a mmo,
‘sta mano.