Articoli

‘O POSTO MIO NUN E’

Mellune appise

by Raffaele_Pisani

MELLUNE APPISE

Cielo ‘e nuvembre.
Nuvole ‘e chiummo.
Mellune appise
for’ ‘o balcone
mettono estate
dint’ ‘e penziere.

Vita

by Raffaele_Pisani

VITA

Chi si’?
Che ssi’?
Che daie?
Daie chello ch’uno cerca
o cose ch’uno nun s’aspetta maie?
E pe’ nu «sì»
quante ne songo ‘e «no»?
E po’, ‘o cchiù brutto,
chello cchiù malamente:
a chi daie tutto,
a chi daie niente.
E dimme: ‘a do’ accumince?
E addò fernisce?
Si’ luce dint’ ‘o scuro
o pure si’ scurore dint’ ‘a luce?
Si’ nu schìzzeco ‘e tiempo
o si’ ‘e ll’eternità ‘o primmo mumento?
Tu si’
pecché
subbeto doppo ‘e te
po’ vene zero
o tu, tu stessa,
si’ chillu zero
ca vene primma
d’ ‘o munno overo?
E dimme, allora, tu si’ verità
o si’ buscia,
si’ na realtà
o sulo ‘a fantasia ‘e nu penziero?
Si’ oro tu, si’ oro,
o nu metallo fàuzo
ca po’ s’arrugginisce ampressa ampressa?
Chello ca è certo
è ca si’ nu mistero,
mistero cchiù d’ogni ata cosa, forse
tu si’ mistero cchiù d’ ‘a morte stessa.

´Pe nu iuoco

by Raffaele_Pisani

PE’ NU IUOCO

Pe’ nu iuoco d’ammore io so’ nnato.
Pe’ nu iuoco ‘e culure me cresceno
dint’a ll’anema suonne e penziere.
Pe’ nu iuoco ‘e speranze
me faccio cumpagno
carnale d’ ‘a gente
pure ‘a cchiù scanusciuta.
Pe’ nu iuoco sti mmane
se fanno autostrade
‘e carezze – ‘e cchiù doce –
e accummencia da ‘o capo stu iuoco
ca vene
me piglia
me lassa
me torna a piglià
e me porta addò eterne
addeventano ‘e ciele
ca tenono ‘e file
‘e stu iuoco d’ammore.

Stelletelle

by Raffaele_Pisani

STELLETELLE

Dint’a ll’aria ‘e Natale
nu criaturo
appiccia stelletelle.
Chisti schìzzeche ‘e luce
ncopp’ ‘e scarpe ‘e nu viecchio
addeventano cénnere.

´O vico

by Raffaele_Pisani

‘O VICO

È mezanotte quase.
For’ ‘o balcone
stongo assettato
e conto ‘e stelle pe’ fa’ passà ll’ore…
Se so’ nzerrate ‘e vasce.
Se stutano int’ ‘e ccase, a una a una,
‘e lluce tutte quante.
Luntano,
‘o canto ‘e nu scugnizzo.
Ncopp’ ‘e titte
s’affaccia ‘a luna.
L’urdema cantina
scenne ‘a serranda. Torna alleramente
– facenno l’angarella –
nu viecchio mbriacone a’ casa soia.
Scappano
quatto gatte:
so’ state spaventate da ‘o rummore
fatto
‘a nu cuoppo chino ‘e cape ‘alice
caduto
‘a coppa ‘a nu sicondo piano.
‘A mezanotte sona.
Nu nennillo
se sceta e chiagne…
For’ ‘o balcone
stongo assettato
e conto ‘e stelle pe’ fa’ passà ll’ore…
Na cartulina m’è arrivata.
Ha scritto:
torno dimane.


´O sole

by Raffaele_Pisani

‘O SOLE

Da ‘o cielo nirofummo
cadeva tanta ‘e ll’acqua ca pareva
vicina overamente ‘a fine ‘o munno.
Nu guagliunciello
ncopp’a nu foglio ‘e nu quaderno ‘e scola
cu nu làppese giallo
ce pittaie ‘o sole.

Strage di capaci

by Raffaele_Pisani

STRAGE DI CAPACI

Pure ‘a luna
stanotte chiagne.

Senza nido

by Raffaele_Pisani

SENZA NIDO

‘E campagnuole hanno tagliato l’albero.
P’ ‘a vernata ca vene sarrà fuoco.
‘O passero è rimasto senza nido.