Vita

Published in ‘O POSTO MIO NUN E’

VITA

Chi si’?
Che ssi’?
Che daie?
Daie chello ch’uno cerca
o cose ch’uno nun s’aspetta maie?
E pe’ nu «sì»
quante ne songo ‘e «no»?
E po’, ‘o cchiù brutto,
chello cchiù malamente:
a chi daie tutto,
a chi daie niente.
E dimme: ‘a do’ accumince?
E addò fernisce?
Si’ luce dint’ ‘o scuro
o pure si’ scurore dint’ ‘a luce?
Si’ nu schìzzeco ‘e tiempo
o si’ ‘e ll’eternità ‘o primmo mumento?
Tu si’
pecché
subbeto doppo ‘e te
po’ vene zero
o tu, tu stessa,
si’ chillu zero
ca vene primma
d’ ‘o munno overo?
E dimme, allora, tu si’ verità
o si’ buscia,
si’ na realtà
o sulo ‘a fantasia ‘e nu penziero?
Si’ oro tu, si’ oro,
o nu metallo fàuzo
ca po’ s’arrugginisce ampressa ampressa?
Chello ca è certo
è ca si’ nu mistero,
mistero cchiù d’ogni ata cosa, forse
tu si’ mistero cchiù d’ ‘a morte stessa.

Last modification: Lun 13 Lug 2015