JAHVE´

Comm’è pesante ‘sta valicia addò
ce stanno tutte quante ‘e sbaglie mieie,
e comme è leggia, comme è leggia, ahimmè!,
st’ata valicia addò ce aveva mettere
‘e ccose bone.
E, muorto ‘e scuorno, mo,
i’ penzo a quanto e a comme
‘sta vita cchiù pulita
campà avarria pututo.
Comm’è pesante ‘sta valicia addò
ce stanno tutte quante ‘e sbaglie mieie.
Addenucchiato
me truvarraie for’ ‘a Porta. Llà
nchiuvato.
Llà, aspettanno
Misericordia.
Llà, cu ‘a speranza sempe cchiù vicina
ca Tu me dice:
trase, te perdono.

So’ n’ommo schiavo ancora ‘e chesta terra,
schiavo d’ ‘e debulezze e d’ ‘a paura.
Schiavo ‘e penziere inutile
e ‘e suonne d’oro fàuze e vacante.
Io m’avvicino a Te cu ‘e mmane chiene
‘e scàndale e ‘e miserie
e Tu m’abbracce
cu ‘e mmane Toie annammurate e sante.
Quanno Te guardo ‘o core mio s’arape
a n’esistenza nova.

È piccerella ‘a casa mia pe’ Te;
strette so’ ‘e ggrare e meze sgarrupate;
na fenestella stremenzita assaie,
poco cchiù grossa ‘e nu pertuso, penza
ca manco ‘o sole ‘a tene ‘n simpatia
e maie ‘a vasa cu nu raggio d’oro.
È piccerella ‘a casa mia pe’ Te
e puveriello è stu patrone ‘e casa,
ma na cuperta ‘e raso antica e bella
dint’ ‘o stipone tengo bona nchiusa
e si aggio ‘a grazia ca nu iuorno ‘e chiste
saglie sti ggrare sgarrupate e strette
e viene a tuzzulià ‘nfaccia a ‘sta porta,
io, primma ‘e T’arapì, ‘a int’ ‘o stipone
caccio ‘a cuperta ‘e raso e pe’ tappeto
T’ ‘a metto sott’ ‘e piede.

Fa’ cunto ch’io
fosse na piantulella
– nu geranio, pe’ ddi’, nu giesummino –
e ca pe’ crescere
acqua nun cerca,
ma carezze,
tante.
Na piantulella io so’
ca pe’ da’ sciure
acqua nun cerca, ma carezze assaie.
Na piantulella io so’
tennera e delicata,
sempe ‘n pericolo,
na piantulella ca sultanto Tu
da ‘o gelo e da ‘e ttempeste
‘e viento puo’ salvà.
Damme riparo
int’ ‘e ccarrezze Toie.