‘O POSTO MIO NUN E’

Cielo ‘e nuvembre.
Nuvole ‘e chiummo.
Mellune appise
for’ ‘o balcone
mettono estate
dint’ ‘e penziere.

Chi si’?
Che ssi’?
Che daie?
Daie chello ch’uno cerca
o cose ch’uno nun s’aspetta maie?
E pe’ nu «sì»
quante ne songo ‘e «no»?
E po’, ‘o cchiù brutto,
chello cchiù malamente:
a chi daie tutto,
a chi daie niente.
E dimme: ‘a do’ accumince?
E addò fernisce?
Si’ luce dint’ ‘o scuro
o pure si’ scurore dint’ ‘a luce?
Si’ nu schìzzeco ‘e tiempo
o si’ ‘e ll’eternità ‘o primmo mumento?
Tu si’
pecché
subbeto doppo ‘e te
po’ vene zero
o tu, tu stessa,
si’ chillu zero
ca vene primma
d’ ‘o munno overo?
E dimme, allora, tu si’ verità
o si’ buscia,
si’ na realtà
o sulo ‘a fantasia ‘e nu penziero?
Si’ oro tu, si’ oro,
o nu metallo fàuzo
ca po’ s’arrugginisce ampressa ampressa?
Chello ca è certo
è ca si’ nu mistero,
mistero cchiù d’ogni ata cosa, forse
tu si’ mistero cchiù d’ ‘a morte stessa.

Pe’ nu iuoco d’ammore io so’ nnato.
Pe’ nu iuoco ‘e culure me cresceno
dint’a ll’anema suonne e penziere.
Pe’ nu iuoco ‘e speranze
me faccio cumpagno
carnale d’ ‘a gente
pure ‘a cchiù scanusciuta.
Pe’ nu iuoco sti mmane
se fanno autostrade
‘e carezze – ‘e cchiù doce –
e accummencia da ‘o capo stu iuoco
ca vene
me piglia
me lassa
me torna a piglià
e me porta addò eterne
addeventano ‘e ciele
ca tenono ‘e file
‘e stu iuoco d’ammore.

Dint’a ll’aria ‘e Natale
nu criaturo
appiccia stelletelle.
Chisti schìzzeche ‘e luce
ncopp’ ‘e scarpe ‘e nu viecchio
addeventano cénnere.