Io,
niente.
Io,
cu ll’ammore,
padrone d’ ‘o munno.
Io
by Raffaele_Pisani
IO
Quanno sarra´ o mumento
by Raffaele_Pisani
QUANNO SARRA’ ‘O MUMENTO
E diceno,
quanno sarrà ‘o mumento,
ca vene
sempe quaccuno pe’ te da’ n’aiuto.
Pe’ mme, chi venarrà?
E chi me pigliarrà p”a mano, chi
l’urdema porta me farrà arapì?
Chi me darrà curaggio?
E chi sarrà ‘o cumpagno ‘e chillu viaggio?
France’
vurria ca fosse n’angelo
cu ll’uocchie doce tale e quale a tte,
sulo accussì
m’abbandunasse dint’a stu mistero
senza tene’ paura ‘e niente cchiù,
sulo accussì,
sulo si a mme piglià venesse n’angelo
cu ll’uocchie doce comme ‘e ttiene tu.
Oggi si ´nnata tu
by Raffaele_Pisani
OGGI SI’ NNATA TU
‘O sole s’è scetato,
c”o pizzo a rrisa
‘o munno attuorno attuorno ha salutato.
Ch’azzurro ‘n cielo!
‘A primmavera
cu ‘a vesta arricamata ‘e fronne nove
ha ditto: io stongo ccà!
Che festa pe’ ll’aucielle,
e ne so’ tante:
pàssere, pietterusse, rundinelle.
Quanta canzone.
L’aria pazzea
cu ‘e palpite d”o core: ‘e ppiglia, ‘e llassa,
‘e pporta ‘a ccà e ‘a llà.
Na fata s’è affacciata,
e quanto è bella,
e comme m’ha guardato appassiunata.
‘E ppene meie?
Chi soffre cchiù!
‘E sbatterme aggio ntiso forte ‘n pietto:
oggi si’ nnata tu!
E´ naturale
by Raffaele_Pisani
E’ NATURALE
Ce simmo appiccecate stammatina.
E chesto che vo’ di’
ca nun ce amammo cchiù?
Ca è niente
mo
chello ca primma
era tutto?
Ca è morte
mo
chello ch’aiere
era vita?
Ca è gelo
mo
chello ca fino
a n’àttemo fa
era calore?
E’ naturale
ca l’azzurro d”o cielo
se sporca ‘e tempesta,
l’importante
è ca po’ torna ‘o sole.
Io tengo a te
by Raffaele_Pisani
IO TENGO A TE
‘O cielo tene
stelle d’argiento,
‘o mare ‘e vvele
pittate ‘e sole,
io tengo a te.
‘A rundinella
tene ‘e ccarezze
d”a primmavera,
‘a palummella
sciure ‘e ciardine,
io tengo a te.
‘O rre ‘e padrone
d”o regno e tene
mille tesore,
tene ‘o mercante
muntagne d’oro,
io tengo a te.
Core ‘e nennillo
tene alleria,
core ‘e figliola
tene speranze
e core ‘e sposa
felicità,
io tengo a te.
San Damiano (Assisi)
by Raffaele_Pisani
SAN DAMIANO(Assisi)
‘O primmo sole ‘e uttombre s’abbracciava
‘e mmuntagnelle càrreche d’aulive.
Che matenata!
Senza malincunia, né dint”o core,
né dint’a ll’aria. Te pigliaie p”a mano…
cchiù llà, San Damiano,
ricco ‘e na pace senza paragone,
‘e na serenità senza cunfine…
Chiacchiariava
‘a miez”aulive ‘o passariello. Attuorno
nu coro d’aucelluzze rispunneva.
Che bella cosa nascere aucelluzzo,
pe’ vèvere
gocce ‘e rusata,
àcene ‘e grano pe’ mangià, padrone
‘e tutte ‘e ccose senza tenè niente.
Aucelluzzo…
gocce ‘e rusata…
àcene ‘e grano…
Tu m’astrigniste
cchiù forte ‘a mano…
cchiù llà, San Damiano…
Ma e´ vita
by Raffaele_Pisani
MA E’ VITA
L’ammore è nu viento
che spezza, che straccia.
L’ammore è nu sole
ch’abbaglia, ca stona,
è l’onna ‘a cchiù forte
d”o mare mpazzuto,
è ‘a spina che pogne,
che scippa, ch’abbrucia,
è ‘a lama ‘e curtiello
cchiù longa e ammulata,
è ‘apprietto ‘o cchiù peggio
ca ‘a notte te leva
speranza ‘e durmì,
è ‘o vino ca sempe
mbriaco te tene,
è fuoco, è catena,
è lampo ‘e tempesta
e po’ è terramoto
ca struie, è ferita
ca chiù nun se sana,
è smania che coce,
è sango che volle,
è freva, è turmiento,
è chianto,
ma è vita!
´E te me piace
by Raffaele_Pisani
‘E TE ME PIACE
‘E te me piace, cchiù d’ogni ata cosa,
‘a gioia e l’entusiasmo
ca miette dint’a chello ca tu faie,
sempe, fosse ‘o cchiù semplice d”e geste
o ‘a cchiù difficile
‘e ll’azione.
‘E te me piace
chella sincerità e chella ducezza
ca forse sulo ll’angele
credo ca teneno.
‘E te me piace
quanno nzieme cu mme vuole sunnanno,
quanno surride
vedenno ‘a primma margarita nata,
quanno te ncante
guardanno ‘o cielo viola e azzurro, appena
‘o sole areto a ll’Etna s’addorme.
‘E te me piace ‘o sguardo ‘e st’uocchie nire,
quanno
p”e strade ‘e chesta vita cammenammo
tenennoce pe’ mmano,
quanno ce abbandunammo dint”a Luce
e ce vuttammo dint’a st’avventura
tentanno ‘e cercà sulo cose overe.